CENECO gapasalig wala power interrruption sa Azkals- Mongolia nga sambowa

Nagpasalig si Edward Gasambelo, presidente sang Central Negros Cooperative (CENECO) nga mangin tayuyon subong nga adlaw ang kuryente para sa hampang sang Philippine Azkals batok sa Mongolia Wolves sa Panaad Stadium sa Siyudad sang Bacolod.

Suno sa iya mabutang sang mga tinawo ang talatapan agud siguruhon ang mga linya sang kuryente sa palibot sang estadyum.

Si Gasambelo dugang nga nagpahayag nga padayon ang ila pag-bantay sa mga hitabo sa Panaad kag mga kaiping nga duog sa ila tuyo nga masiguro ang mangin madinalag-on nga hampang nga football dire.

Nag- ako siya nga may nakit-an sila nga problema teknikal nga ayhan mangin daku nga sablag kon wala makit-an sang ila nga tinawo kag sa gilayon ini gin kaayo.

Sa pihak nga bahin, ang mga senior citizens subong maka-agum na sang discount sa Ceneco pahayag ni Gasambelo sa isa ka pakig-angot sa isa ka mayor nga istasyon sang telebisyon dire.

Yari ang pila ka mga pagsulundan: ang konsumo sang aplikante kinahanglan nga indi mag taas pa sa 100 kwh, sa iya naka-panglan ang metro, isa lang ang maka-agum sang discount sa isa ka panimalay kag kinanglan mag- apply sang personal o sa otorisado nga representante sang Ceneco.

OFWs ginagamit bilang drug couriers

Nagakabalaka ang Philippine Drug Enforcement Agency (PDEA) sa makatuloblag na nga kaso sang mga Overseas Filipino Workers nga ginagamit bilang couriers sang mga sindikato sang droga

Magadala sang dugang nga kahuy-anan sa pungsod Pilipinas kon ang ini nga problema indi matagaan sang igtalupangod.

Isa ka OFW nga gina-abiabi sang iya utod

Suno sa ulihi nga report madamo na sang mga OFW ang nadakpan sa sini nga ilegal nga hilikuton kag nasentensiyahan sang kamatayon sa iban nga mga pungsod.

Amo ini ang rason kon ngaa ginlunsar ang Anti-Drug Courier Program para sa Visayas region, agod makahibalo ang mga pumuluyo bahin sa sini nga problema.

Si Director Gladys Rosales sang PDEA nagsiling nga sang sini lang nga January 2011 nakarekord na sila sang 689 nga kaso kag 88 diri ang nagapangatubang sang silot nga kamatayon sa nanohaytohay nga mga pungsod kag iban pa nga mga kaso may kaangtanan sa droga.